Foto bloot ter illustrasie. (Argieffoto: Lorraine Claasen)
Johan van Eck, ʼn 76-jarige boer van die Trichardtsdal-omgewing in Limpopo, veg tans om sy lewe nadat hy Saterdagoggend wreedaardig met kapmesse op die plaas Carpe Diem aangeval is.
Volgens voorlopige inligting was Van Eck besig om sy laaste besittings op die plaas op te laai omdat hy besig was om te verhuis toe twee onbekende aanvallers hom in sy woning se badkamer oorval het.
Daar word verneem dat Van Eck R5 000 kontant by hom gehad het wat bedoel was om werkers mee te betaal, maar die aanvallers is met die geld daar weg.
Van Eck het dapper teen sy aanvallers geveg, maar het veelvuldige steek- en snywonde aan sy kop, arms en rug opgedoen.
Die plaasbestuurder het kort ná die voorval op Van Eck afgekom en onmiddellik noodhulp ontbied. Hy is in ʼn kritieke toestand in die Hoedspruit- private hospitaal opgeneem waar hy tans behandeling ontvang.
Die polisie asook lede van die Hoedspruit- en die Ofcolaco-plaaswag het vinnig op die aanval gereageer.
Plaaswaglede het met behulp van spoorsnyerhonde die verdagtes se spore tot in die Lorraine-woongebied gevolg, waar dit egter doodgeloop het.
Die polisie se speurders, lede van misdaadintelligensie en ʼn spesiale opsporingspan is reeds by die ondersoek betrek om die skuldiges vas te trek. Daar word gehoop dat waardevolle leidrade in die Lorraine-gemeenskap spoedig tot inhegtenisnemings kan lei.
Pieter Gerber, ʼn raadslid en streeksameroeper van die VF Plus wat self deel van die plaaswagstrukture is, monitor die situasie van naby en is in noue kontak met die betrokkenes op die toneel.
VF Plus veroordeel ‘wrede aanval’
André Moss, VF Plus-LPW en die party se provinsiale leier, het sy skok oor die gebeure te kenne gegee en beklemtoon dat die wreedheid van die aanval die party diep geraak het.
“Hierdie voorval dien as ʼn skerp herinnering dat landelike gemeenskappe nooit hul waaksaamheid kan verslap nie. Die aard en tydsberekening van die aanval toon dat misdadigers dikwels toeslaan wanneer mense dit die minste verwag.”
Moss het verder uitgebrei oor die belangrikheid van paraatheid in afgeleë gebiede en die noodsaaklikheid van goeie samewerking tussen veiligheidstrukture om sulke tragedies te voorkom.
“Volgehoue paraatheid, samewerking tussen plaaswagstrukture en die gemeenskap, en ʼn sigbare teenwoordigheid van die polisie, bly noodsaaklik om die veiligheid van inwoners te beskerm.”
Die VF Plus het sy innige meegevoel met Van Eck en sy familie in hierdie traumatiese tyd betuig en hom ʼn spoedige en volkome herstel toegewens.
“Ons doen ʼn beroep op enigiemand met inligting om na vore te kom sodat die skuldiges voor die gereg gebring kan word,” het Moss gesê.